雲吞麵喺香港係好常見嘅美食，不過講到好食嘅雲吞麵就唔係成日有喇，其中，香港麥奀記嘅雲吞麵雖然係貴咗小小，但水準一直keep得唔錯。

麥奀雲吞麵世家係由第二代「麥字派」雲吞麵嘅其中一個代表麥鏡鴻所創辦，麥鏡鴻因為身材瘦削，又叫做麥奀。佢嘅祖先喺清朝咸豐年代已經賣緊雲吞麵，不過真正將雲吞麵發揚光大嘅「雲吞麵大王」，係麥奀嘅父親麥煥池。喺上世紀20年代，麥煥池已經喺廣州街頭挑擔挑賣雲吞麵，因為整得好食，後嚟仲上埋鋪，開咗池記。據講麥煥池係第一個用河蝦蝦子加埋大地魚做湯底，兼且用蝦嚟整雲吞餡。池記最鼎盛時期喺廣州有八間鋪，連蔣介石都係池記嘅客人。最威水嘅係當年廣州被日軍空襲，實施燈火管制，剩係得池記可以生火，就係因為當時嘅「南天王」陳濟棠好中意食佢嘅雲吞麵。

1945年，麥煥池一家移居香港，亦將招牌雲吞麵帶嚟香港。麥奀盡得父親真傳，初時喺上環金龍酒店主理粥麵部，酒店以「廣州池記之子麥奀主理」嚟作為生招牌。後嚟酒家結業，麥奀於是喺中環機利文街開麥奀記大牌檔，佢嘅細佬同仔女、三女婿都有嚟鋪頭幫手，恒生銀行創辦人之一何添等名人都嚟幫襯過。香港嘅麥奀雲吞麵世家、麥文記、麥奀記（忠記）、何洪記、麥明記、麥兆記、正斗粥麵嘅雲吞麵據講都係同屬一門，源自池記。

網上圖片。